ޗިލްޑްރަންސް އޮމްބަޑްސްޕަރސަންގެ އޮފީހުން ކުރިއަށް ގެންދާ "ކުދިންގެ ރައުޔު" ސިލްސިލާ ފޯރަމްގެ 09 ވަނަ ފޯރަމް 2024 އޮގަސްޓު 31 ވަނަ ދުވަހު އިމާދުއްދީން ސްކޫލްގައި ކުރިޔަށްގެންގޮސްފައިވެއެވެ. އެއް ދުވަހުގެ މުއްދަތައް ކުރިއަށް ގެންދިޔަ މި ފޯރަމުގައި އިމާދުއްދީން ސްކޫލްގެ 80 ދަރިވަރުން ވަނީ ބައިވެރިވެފައެވެ. އޭގެތެރޭގައި، ގްރޭޑް 7، 8، 9 އަދި 10 ގެެ ދަރިވަރުން ހިމެނެއެވެ. 

ކުދިންގެ ރައުޔު ފޯރަމަކީ، ކުދިންނާ ގުޅޭ ކަންކަމުގައި އެކުދިންގެ ޚިޔާލާއި މަޝްވަރާ ހޯދައި، އެކުދިން ކަންކަމުގައި ދެކޭގޮތް ހާމަކުރުމަށާއި، ކުޑަކުދިންގެ ޙައްޤުތަކާއި މަސްއޫލިއްޔަތުތަކަށް ކުދިން އަހުލުވެރިކުރުވުމަށް ބާއްވާ ފޯރަމެކެވެ. މި ފޯރަމް އަމާޒުކުރެވިފައިވަނީ އުމުރުން 14 އަހަރާއި 18 އަހަރާ ދެމެދުގެ ދަރިވަރުންނަށެވެ. މި ފޯރަމުގައި ކުޑަކުދިންގެ ޙައްޤުތަކާ ގުޅުންހުރި ތަފާތު 10 މަޢުޟޫއަކަށް ކުދިން މަޝްވަރާކޮށް ރޯލް ޕްލޭ ހުށަހަޅާފައި ވެއެވެ. އަދި ކުދިން ހުށަހަޅާފައިވާ ރޯލް ޕްލޭތަކުގައި އެކުދިންނާ ގުޅޭ އެކި ކަންކަމުގައި ކުދިންގެ ޚިޔާލާއި މަޝްވަރާ ހިއްސާކޮށްފައި ވެއެވެ. 

ކުދިންގެ ރައުޔު ފޯރަމް މީގެ ކުރިންވެސް ރާއްޖޭގެ އެކި ސަރަހައްދުތަކަށް އަމާޒުކޮށް ވަނީ ބާއްވާފައެވެ. އެގޮތުން އައްޑޫ ސިޓީގެ ދަރިވަރުންނަށާއި، ހދ.އަތޮޅުގެ ރަށްރަށުގެ ދަރިވަރުންނަށާއި، ފުވައްމުލައް ސިޓީގެ ދަރިވަރުންނަށާއި، ގދ. އަތޮޅުގެ ރަށްރަށުގެ ދަރިވަރުންނަށާއި، ގއ. ގެމަނަފުށީގެ ދަރިވަރުންނަށާއި، ހއ. އަތޮޅުގެ ރަށްރަށުގެ ދަރިވަރުންނާއި. ށ. އަތޮޅުގެ ސްކޫލްތަކުގެ ދަރިވަރުން އަދި ހުޅުމާލޭ ޘާނަވީ ސްކޫލްތަކުގެ ދަރިވަރުންނަށް އަމާޒުކޮށްގެން ފޯރަމްތައް ވަނީ ބާއްވާފައެވެ. މި ފޯރަމްތައް މެދުވެރިކޮށް ޖުމްލަ 854 ދަރިވަރުންނަށް ކުޑަކުދިންގެ ޙައްޤުތަކާ ގުޅޭ ތަފާތު އެކި މައުލޫމާތު ފޯރުކޮށްދެވިފައިވެއެވެ.